Alls gista sex aðilar í fangaklefa eftir nóttina en hér eru helstu atvikin sem skráð voru í dagbók lögreglunnar á höfuðborgarsvæðinu.
Lögreglan sem annast Austurbæinn, Miðbæinn, Vesturbæinn og Seltjarnarnes lét fjarlægja bifreið með dráttarbifreið þar sem henni hafði verið lagt fyrir innkeyrslu og lokað þannig aðra bifreið inni. Ítrekað hafði verið reynt að ná í eiganda bifreiðarinnar en án árangurs. Lögreglan fjarlægði einnig skráningarmerkin af bifreiðinni þar sem hún reyndist ótryggð.
Lögregla frá sömu lögreglustöð stöðvaði ökuníðing sem ók á meira en tvöföldum hámarkshraða. Var hann sviptur ökuréttindum á staðnum.
Þá var aðili handtekinn grunaður um sölu fíkniefna en hann var með nokkuð magn fíkniefna á sér auk þess að vera með mikið magn reiðufés. Var hann vistaður í fangaklefa vegna málsins.
Slagsmál brutust út í miðbæ Reykjavíkur en tveir aðilar voru handteknir og fluttir á lögreglustöðina við Hlemm. Voru þeir lausir eftir skýrslutöku.
Tilkynning barst lögreglunni sem sér um Kópavog og Breiðholt, vegna þjófnaðar úr verslun en málið var afgreitt á vettvangi.
Sama lögreglan handtók aðila vegna líkamsárásar í heimahúsi en var kauði vistaður í fangaklefa vegna málsins.
Lögreglan sem þjónustar Grafarvog, Mosfellsbæ og Árbæ handtók einn aðila eftir að tilkynningar höfðu borist á milli nágranna um kvöldið og nóttina. Var hann látinn gista fangaklefa en hann var ofurölvi og gekk hvorki né rak að ræða við hann. Þá hafði hann einnig ráðist að nágranna sínum.