Íslenskur nemi særðist alvarlega í ágúst 1978 þegar sturlaður maður réðist inn í íbúð og skaut fyrrverandi eiginkonu sína til bana og særði Íslendinginn og tvö börn hennar alvarlega áður en hann gerði tilraun til að fremja sjálfsvíg.
Í fyrstu fréttum af skotárásinni segir að 31 árs gamall Íslendingur hafi særst alvarlega þegar maður réðist inn í íbúð vopnaður byssu og skaut fyrrum eiginkonu sína til bana en þar var hún ásamt Íslendingnum og tveimur börnum hennar. Skaut maðurinn þau öll áður en hann beindi byssunni að sjálfum sér. Hann lifði hins vegar sjálfsvígstilraunina.
Hér má lesa fyrstu frétt Vísis um málið en neðar má lesa fleiri fréttir:
Skotárás í fjölbýlishúsi í Osló:
Íslendingur alvarlega særður
Kona myrt og tvö börn hennar sœrð skotsárum
Þrjátíu og eins árs gamall Íslendingur særðist alvarlega í skotárás í fjölbýlishúsi í Osló á laugardaginn. Hann liggur nú á sjúkrahúsi og hefur lögreglan ekki fengið leyfi lækna til að yfirheyra hann vegna þess hversu alvarlega hann er særður. Í skotárásinni var ung norsk kona myrt og tvö börn hennar særð en árásarmaðurinn reyndi síðan að fremja sjálfsmorð, sem mistókst. Hann liggur einnig mikið særður á sjúkrahúsi. Visir fékk það staðfest hjá lögreglunni i Osló í morgun, að ungi maðurinn sem særðist alvarlega i skotárásinni, væri Íslendingur, sem dvalið hefur í Noregi um hrið. Það var um hádegisbilið á laugardaginn sem árásin var gerð. Íslendingurinn var þá í heimsókn hjá fráskilinni norskri konu og tveimur börnum hennar í íbúð konunnar í fjölbýlishúsi í borginni. Þá réðist fyrrverandi eiginmaður hennar, sem er 40 ára gamall Norðmaður, inn í íbúðina vopnaður byssu og hóf skotárás á þau fjögur, sem í íbúðinni voru. Fyrrverandi eiginkonu sina skaut hann til bana, en særði Íslendinginn alvarlega og eins börnin tvö. Eftir það reyndi árásarmaðurinn síðan að fremja sjálfsmorð, en tókst ekki, en særði hins vegar sjálfan sig alvarlega. Íslendingnum tókst að komast út úr íbúðinni og niður á götu. Þaðan komst hann inn í annað fjölbýlishús og lét kalla til lögreglu. Íslendingurinn, börnin tvö og árásarmaðurinn liggja öll á sjúkrahúsi í Osló. Íslendingurinn er það alvarlega særður, að læknar hafa meinað lögreglunni að yfirheyra hann.
Í næstu frétt Vísis sem birtist daginn eftir, kom fram nafn Íslendingsins en það var Eggert Lárusson en þá var hann úr lífshættu en þó var ekki enn hægt að yfirheyra hann. Börn konunnar sem lést í árásinni, 18 og 10 ára voru einnig úr lífshættu. Var talið að árásarmaðurinn, sem stórslasaðist er hann skaut sjálfan sig í hausinn, myndi missa sjón á báðum augum.
Eggert ur lífshœttu
en hefur ekki enn verið yfirheyrður
Frá Jóni Einari Guðjónssyni, fréttaritara Vísis í Osló. Læknar á Ulleval sjúkrahúsinu í Osló hafa enn ekki gefið norsku lögreglunni leyfi til að yfirheyra þá aðila, sem særðust í skotárásinni i Kongscentralen i Osló. Því er ástæðan fyrir árásinni enn ekki vituð eða hvers vegna Eggert Lárusson var staddur í íbúðinni, þar sem árásarmaðurinn ruddist inn og skaut á fólkið með þeim afleiðingum að húsmóðirin lést. Börn hennar 18 ára og 10 ára og Íslendingurinn Eggert Lárusson eru nú talin úr lífshættu. Árásarmaðurinn reyndi að stytta sér aldur eftir verknaðinn, en skot hans geigaði og liggur hann því stórslasaður á sjúkrahúsinu. Talið er að hann missi jafnvel sjón á báðum augum. Maður, sem staddur var í næstu íbúð, tilkynnti lögreglunni um skotárásina.
Í þriðju frétt Vísis kemur í ljós að Eggert væri kominn til meðvitundar og hafi getað útskýrt af hverju hann hafi verið í íbúðinni þegar hin banvæna skotárás var gerð. Hann hafði verið við nám í hótelrekstri í Stavangri síðastliðin tvö ár en hafi stefnt á framhaldsnám í Lillehammer þá um haustið. Hann hafi búið heima hjá kunningja sínum í Osló um sumarið en sá kunningi hafði leyft konunni sem lést í árásinni, að gista nóttina fyrir árásina þar sem hún óttaðist fyrrum eiginmann sinn. Hún hafi síðan þurft að sækja nauðsynjar heim til sín og Íslendingurinn boðist til að fara með henni þangað. Og því fór sem fór. Hér fyrir neðan má lesa frétt Vísis:
Íslendingurinn kominn til meðvitundar efftir skotárásina í Noregi
Var fyrir tilviljun staddur í íbúðinni
Eiginkona Norðmannsins hafði leitað skjóls hjá kunningjum sínum vegna ógnana mannsins, en var að sækja muni sína í íbúðina, er árásin var gerð.
Frá Jóni Einari Guðjónssyni, fréttaritara Visis í Osló í morgun: Eggert Lárusson, sem særðist í skotárásinni i Kongscentralen í Osló á dögunum, er kominn til meðvitundar, og eru hann og börn konunnar, sem lést, talin á batavegi. Norska lögreglan hefur nú yfirheyrt þau og fengið skýringu á því, hvernig á því stóð, að Eggert var staddur í íbúð norsku konunnar, þegar fyrrverandi eiginmaður hennar ruddist inn og gerði skotárásina. Eggert hefur verið við nám í hótelrekstri í Stavangri undanfarin tvö ár, og ætlaði í haust til framhaldsnáms í Lillehammer. Í sumar hefur hann búið hjá kunningjum sínum í Osló, Síðastliðinn föstudag kom þangað kona, sem var kunnug vinum Eggerts. Bað hún um að fá þar gistingu ásamt tveimur börnum sínum, vegna þess að fyrrverandi eiginmaður hennar hefði æ ofan í æ komið og ógnað henni á heimili hennar. Á laugardagsmorguninn vildi hún fara heim til að ná i ýmsa nauðsynjamuni. Eggert bauðst til að aka henni og börnum hennar til heimilisins til þess að ná í það, sem hún þurfti á að halda. Á meðan þau stöldruðu við í íbúðinni réðst svo fyrrverandi eiginmaður konunnar vopnaður inn í íbúðina, réð konunni bana og særði Eggert og börnin alvarlega, eins og fram hefur komið i fréttum.