Tveir erlendir karlmenn hafa verið ákærðir fyrir smygl á rúmu kílói af kókaíni til landsins. Höfðu mennirnir komið til landsins með Norrænu, en lögreglan greip þá á gistiheimili á Egilsstöðum.
Samkvæmt Austurfrétt kemur þetta fram í ákæru embættis héraðssaksóknara.
Mennirnir höfðu alls rúmlega 1,1 kíló af kókaíni með sér, sem þeir eru taldir hafa ætlað að selja hér á landi.
Þurftu mennirnir að fara yfir þrjú landamæri með kókaínið; efnið höfðu þeir með sér frá Rotterdam í Hollandi og fóru með það í gegnum Þýskaland og Danmörku, þar sem þeir fóru svo um borð í Norrænu.
Komu þeir svo til landsins með ferjunni um miðjan október.
Annar mannanna er Hollendingur, en í hans fórum fundust 677 grömm, en þau fundust í káetu hans í ferjunni sem og í farangri hans á gistihemilinu.
Hinn maðurinn er Spánverji, en fundust rúm 400 grömm í hans fórum. Hafði hann falið þau innvortis og í safafernu sem fannst á gistiheimilinu.
Mennirnir, sem báðir eru á sjötugsaldri, er í gæsluvarðhaldi í fangelsinu á Hólmsheiði og bíða réttarhalda.