Landhelgisgæslan dró hræ af búrhvali út á sjó – MYNDIR

Varðskipið Freyja var kallað út um helgina til að kanna aðstæður við Bessastaði í Hrútafirði þar sem hval hafði rekið á land. Áhöfnin sendi tvo léttbáta frá skipinu til að athuga aðstæður umhverfis hræið. Reyndist um 15 metra langan búrhval að ræða.

Samkvæmt síðu Landhelgisgæslunnar var hvalurinn nánast á þurru en á meðan beðið var flóðs voru taugar setta í sporð hans. Þar sem ekki náðist að koma Freyju nálægt landi sökum grynninga var brugðið á það ráð að nýta léttbáa skipsins til að toga dýrið út. Síðdegis á laugardag losnaði svo dýrið úr fjörunni og var dregið að varðskipinu Freyju og tengt dráttartaug.

Var búrhvalurinn dreginn um 30 sjómílur norður af Horni þar sem honum var sleppt utan við sjávarfallastrauma.