Jón Magnús Jóhannesson, deildarlæknir á Landspítalanum sem hefur undanfarið barist gegn hinum ýmsu mýtum sem hafa sprottið upp í tenglsum við COVID, segir að rekstrarstjóri Café Roma í Kringlunni get vel verið með andlitsgrímu í Kringlunni líkt og aðrir. Maðurinn, Zoran Kokatovic, fullyrti í viðtali við Stundina að hann hugðist fara í hungursverkfall þar til hann fær að vera grímulaus í Kringlunni.
Zoran fullyrðir að hann geti ekki verið með grímu þar sem hann sé „haldinn taugasjúkdómi sem getur valdið ofnæmisviðbrögðum við skerta súrefnisinntöku“. Hann segist hafa læknisvottorð upp á þetta.
Jón Magnús segir í Facebook hópnum Vísindi í íslenskum fjölmiðlum að þetta sé einfaldlega bull. „Hér er mikilvægt að undirstrika að grímur, hvort sem um er að ræða skurðgrímur, taugrímur eða fínagnagrímur, skerða ekki súrefnisflutning til lungna og um líkamann. Þær valda þannig ekki, eins og haft er eftir Zoran í fréttinni, “skertri súrefnisinntöku”,“ skrifar Jón Magnús.
Hann segir engan grundvöll fyrir undanþágu. „Það er alls engin forsenda fyrir því læknisvottorði sem nefnt er hér í fréttinni, og ekki grundvöllur fyrir því að hann fái undanþágu frá grímuskyldu. Ég er hissa á að þrálát mýta um grímunotkun sé sett fram án frekari athugasemda.“