Thelma nokkur hefur fengið nóg af útigöngu illa hirts sauðfjárs hér á landi. Hún segir magn kinda sem gangi lausar alltof mikið með tilheyrandi óþrifnaði og skemmdarverkum.
Thelma ritar um þetta færslu og birtir þar jafnframt myndir af illa hirtum kindum í Borgarbyggð. Hún segir:
„Má til með að birta hér myndir af kindum sem ganga lausar í Borgarfirði og af útgangi þeirra að dæma eru þær allar útigengnar. Í það minnsta ekki hirtar.“
Og Thelma heldur áfram. „Hér er Mast og Borgarbyggð að klikka. Borgarbyggð ver þennan ágang með kjafti og klóm. Magn kinda sem ganga úti á veturna í kringum okkur að öll skjól eru fullnýtt, með tilheyrandi óþrifnaði og skemmdarverkum. Það er efni í aðra myndasyrpu að birta að birta ástandið á húsakostinum hjá okkur, en þetta hefur viðgengist í áratugi.“
Gunnar sauðfjárbóndi gerir færslu hennar að umtalsefni í fjölmennum hópi Sauðfjárbænda hérlendis á Facebook. Þar segir hann:
„Svona umhirða er sauðfjárrækt í landinu örugglega ekki til framdráttar.“
Annar Gunnar, sem líka er sauðfjárbóndi, leggur líka orð í belg. „Maður sér nú rollur í tveimur reifum víðar en í Borgarfirði. Til háborinnar skammar þó svo bændur fái nánast ekkert fyrir ullina,“ segir Gunnar.
Kristján nokkur sauðfjárbóndi er síður en svo sáttur. „Að það skuli vera til bændur sem bera í bætifláka fyrir svona meðferð og reiðuleysi, er stéttinni til skammar, sem og MAST og sveitarfélaginu fyrir að taka ekki á málinu!,“ segir Kristján ákveðinn.