Sigursteinn Másson, rithöfundur, blaðamaður og aðgerðasinni, lýsir á Facebook-síðu sinni hrollvekjandi upplifun sem hann varð fyrir á dögunum í Blómasetrinu í Borgarnes. Hann varð upp úr þurru og án alls aðdraganda gífurlega óttasleginn eftir að hafa misst allan mátt.
„Ég upplifði skyndilegan ótta 10. ágúst þegar ég missti á einni mínútu líkamlegan mátt og gat varla talað. Þetta gerðist hér í Blómasetrinu í Borgarnesi, sem betur fer, því yfirveguð viðbrögð þeirra Kötu og Svövu skiptu sköpum að ég örvænti ekki,“ segir Sigursteinn.
Hann segist hafa markvisst róað sig niður ásamt þeim sem voru á staðnum. „Svava nuddaði axlir mínar og höfuð og Kata róaði mig með einstakri nærveru sinni. Ég bað almættið um hjálp í hljóði um leið og ég spurði um þær breytingar sem ég þyrfti að gera á lífi mínu. Ég prófaði svörin með sjálfum mér, eitt af öðru, og fékk svör þannig að í hvert sinn að ég hitti á rétt svar þá var eins og ýtt væri á rofa í rafmagnstöflu. Allan tímann passaði ég öndunina,“ segir Sigursteinn.
Honum tókst að halda þessu í skefjum og var niðurstaða lækna að hann væri hraustur líkamlega. „Á innan við hálftíma var ég kominn til baka en örþreyttur næstu tvo daga. Læknisskoðun og blóðprufur leiddu í ljós að ég er hraustur líkamlega og blóðþrýstingur eins og hjá unglingi. Það var andleg streita sem slökkti á höfuðrofanum mínum á mánudag í síðustu viku. Nú er ég aftur kominn á þennan paradísarstað til að reyna að skilja betur þessa reynslu, þessa viðvörun, hlusta á sjálfan mig og umhverfið og undirbúa breytingar á minni tilveru,“ segir Sigursteinn.