Sigurður G. Guðjónsson lögmaður er tengdur fjölskyldu Kolbeins Sigþórssonar. Hann hefur starfað sem lögmaður Bakarameistarans, sem er í eigu Sigþórs Sigurjónssonar, föður Kolbeins, og situr líka í stjórn fyrirtækisins – einn þriggja stjórnarmanna ásamt foreldrum Kolbeins. Þar að auki er Sigurður G. forseti dómstóla KSÍ: Starfar þar með lögmanni Kolbeins, Herði Felixi Harðarsyni, sem er þar varamaður.
Í samtali við Stundina segir Gunnar Ingi Jóhannsson lögmaður, Þórhildar Gyðu Arnarsdóttur að „það er ekki eins og þarna sé óháður lögmaður á ferð sem er að koma á framfæri einhverjum sannleika, heldur er verið að reyna að gera lítið úr brotaþola“.
Segja má að allt hafi orðið vitlaust þegar lögfræðingurinn Sigurður G. birti gögn á Facebook um mál sem varðaði Kolbein og Þórhildi Gyðu sem Kolbeinn beitti ofbeldi og gekkst síðar við sátt og miskabótum. Áðurnefndur lögmaður birti nýlega brot úr lögregluskýrslum á Facebook-síðu sinni. Þar kom fram samtal lögreglu við brotaþola Kolbeins, Þórhildi Gyðu.
Gunnar Ingi segir að slík birting rannsóknargagna geti varðað við brot á hegningarlögum. Hann segist vera að íhuga að kæra Sigurður G. Guðjónsson til lögreglu vegna birtingarinnar.
Gunnar Ingi segir að rík ástæða sé til þess að hafa áhyggjur af því að rannsóknargögn í sakamáli eða sakamálum séu notuð í annarlegum tilgangi á opinberum vettvangi; ástæðu til að hafa áhyggjur af því að lögmaður sem ekki hefur aðkomu að málinu sé fenginn til að „fronta“ birtingu slíkra gagna.
Sigurður G. hefur sætt harðri gagnrýni fyrir birtingu gagnanna; konan sem um ræðir, Þórhildur Gyða, ætlar að leita réttar síns vegna málsins og formanni Lögmannafélags Íslands, Sigurði Erni Hilmarssyni, sagðist hafa brugðið við lesturinn og að hann skildi ekki hvernig lögmanni detti í hug að birta lögregluskýrslur á samfélagsmiðli.