„Ástarþakkir fyrir góðar viðtökur við grein um illa gerð skólaslit sem voru vanhugsuð í meira lagi og særandi,“ segir Birna Gylfadóttir sem er móðir drengsins sem ekki var kallaður upp á svið við skólaslit nýverið.
Birna segir að „tilgangurinn með þessu var að vekja athygli á þessu máli og að slikt atvik gerist aldrei aftur.“ Hún segir að tilgangurinn með því að vekja athygli á málinu hafi hins vegar alls ekki verið „að taka skólastjóra og starfsfólk skólans af lífi. Þau hafa gert margt undurgott og líka klúðrað – eins og við öll – við erum öll mannleg og gerum mistök; Guð einn veit að ég hef gert mistök trekk í trekk.“
Birna segir að eins mikið og henni þyki vænt um stuðning fólks í kommentakerfinu, sms-um og öðrum skilaboðum „þá er ég leið þegar fólkið sem að þessu stóð stendur fyrir framan aftökusveit – það var ekki tilgangur fréttarinnar. Tilgangur minn var sá að fyrirbyggja að svona nokkuð gerist aldrei aftur; hvorki hér né annarsstaðar og ég hugsa og vona að þeim tilgangi sé náð; við erum ekki bættari með hatursáróðri og ljótu nafnakalli. Það er nákvæmlega það sem við eigum að kenna – þeim sem yngri erum – að það er rangt. Ég veit að ef við stöndum saman þá verður breyting til hins betra í svona málum smátt og smátt.“