Maryam Holton birti færslu á Twitter þar sem hún segir frá ótrúlegum samskiptum sínum við ÓP-útgáfu sem gefur út krossgátublaðið Barnagátur.
Segir hún frá því í færslunni að sjö ára sonur hennar hafi verið að svara krossgátu úr blaðinu Barnagátur er hún rak augun í orð sem átti að skrifa í gátuna.
„7 ára sonur minn var að svara krossgátu í vor og mér var mjög brugðið þegar ég sá orðið sem vantaði í krossgátuna. Ég sendi ábendingu á Barnagátur og fékk þetta svar í dag. Er ekki í lagi?“
Orðið sem var í gátunni er „svertingja“ og vísar örin niður. Orðið sem lesandinn á að skrifa er fimm stafa og byrjar á N.
Maryam sendi tölvupóst á ÓP-útgáfuna sem gefur blaðið út og er svarið kom henni á óvart.
„Daginn, þetta er reyndar gömul gáta og þá var þetta bara orðalagið á þeim tíma. Við tökum tillit til þess og notum hana ekki aftur…en hvað finnst þér þá um orðið „hvítingja“ white trash? Sem blökkumenn nota ansi oft um okkur?“
