Margslungið veður er í kortunum þessa dagana, en versta veðurútlitið er þó á norðvestanverðu landinu með norðaustan stormi eða roki með snjókomu í dag og á morgun, en þó má gera ráð fyrir að það dúri um tíma í dag. Þetta kemur fram í hugleiðingum veðurfræðings.
Þar segir að einnig að fyrir norðan- og austanlands er austan hvassviðri í fyrstu og fylgir því talsverð úrkoma fyrir austan, en sunnanlands hefur vindur snúist í hægari suðlæga átt með skúrum eða éljum.
Vindur snýst einnig til suðlægrar áttar norðan- og austanlands í dag og styttir þá upp á þeim slóðum. Bætir í vind með éljagangi norðaustanlands eftir hádegi á morgun, en fer veðrið að ganga niður annað kvöld.
Þegar líður á miðvikudag ætti því að vera orðið skaplegt veður á landinu og fimmtudagur lítur vel út. Veðurfærðingur mælir með að nýta hann vel til útivistar því næsta lægðakerfi nálgast úr suðvestri og má búast við miklum umhleypingum um næstu helgi.