„Staðreynd dagsins. Vegna skattalækkana okkar síðustu tvö ár hefur fólk með mánaðarlaun á bilinu 350 – 400 þúsund um 10 þúsund krónum meira milli handanna í hverjum mánuði.“
Þetta skrifaði Bjarni Benediktsson, fjármálaráðherra og formaður Sjálfstæðisflokksins, á Facebook-síðu sína.
Viðbrögð fólks við færslunni voru almennt ekki góð og flestir sögðu Bjarna vera að stæra sig af litlu.
Jóhann Waage, kemur til skjalanna í athugasemd við færslu Bjarna og tjáir sig um átakanlegan atburð í lífi sinu, sem hann er enn að glíma við, ávarpar Bjarna:
„Bjarni, fyrir 4 árum síðan var ég heilbrigður og í góðu standi, hjólaði út um allt og var í blóma lífsins. En í heilanum mínum tifaði tímasprengja sem ég fæddist með og hún sprakk og heilbrigðiskerfið brást mér og ég var látinn liggja heima í tvo sólarhringa til viðbótar með blæðingu inn á heila,“ skrifar Jóhann og heldur áfram:
„Eftir sit ég, eftir að hafa verið kippt harkalega niður á jörðina með margar slæmar eftirstöðvar af veikindum mínum. Ég reyni að vinna 50% vinnu til að halda fjölskyldunni minni frá því að lenda á götunni, þó ég ég sé ekki mikill bógur.“
Og bætir við:
„En þar sem að ég reyni að vinna og vera úti á meðal fólks, þá lendi ég í miklum skerðingum frá TR og er að lenda í skuld ofan á allt út af því. Ég er á leigumarkaði, húsnæðis-og leiguverð hérlendis er út úr öllum veruleika. Ég er að neyðast til að greiða um 300 þúsund á mánuði, sem er um 60-70% af mínum ráðstöfunartekjum.
Fyrir 4 árum síðan spáði ég ekkert í öryrkjum, frekar en þið hin….fólk sem er heilt heilsu spáir ekkert í veikindum og heldur að ekkert komi fyrir það. En þið á Stjórnarheimilinu hafið algjörlega hlunnfarið öryrkja um áraraðir, sama hverju þið reynið að halda fram og loforð síðustu kosninga hafa ekki litið dagsljós.“