Íslenskur karlmaður á fimmtugsaldri er grunaður um að hafa nauðgað og frelsissvipt íslenska konu í Hollandi í síðustu viku.
Fréttablaðið fjallar um málið í dag. „Við getum staðfest að lögreglan sé með til rannsóknar ofbeldismál vegna atviks sem átti sér stað í Hollandi. Ekkert meira en það,“ hefur Fréttablaðið eftir Ævari Pálma Pálmasyni, yfirmanni kynferðisbrotadeildar lögreglunnar. Ítrekar hann að kynferðisbrotadeildin tjáir sig ekki um einstök mál.
Meintur gerandi hefur, samkvæmt heimildum Fréttablaðsins tvisvar sinnum verið dæmdur fyrir nauðganir og ofbeldi á Íslandi, síðast árið 2018 þegar hann var dæmdur í fjögurra ára fangelsi fyrir nauðgun. Ef miðað við almenna dómaframkvæmd má segja að fjögurra ára fangelsi sé afar þungur dómur og því ljóst að um mjög alvarlegt brot hefur verið að ræða.
Samkvæmt Fréttablaðinu er lögreglan í Amsterdam að reyna að hafa upp á manninum. Brotaþolinn gaf skýrslu hjá lögreglunni í Hollandi í liðinni viku og svo aftur hjá íslensku lögreglunni en hún er nú komin til Íslands. Ekki er lokum fyrir því skotið að málið verði útkljáð fyrir íslenskum dómstólum þar sem bæði meintur gerandi og brotaþoli eru Íslendingar.
Fréttablaðið hefur eftir Karli Steinari Valssyni, yfirlögregluþjóni alþjóðasviðs ríkislögreglustjóra, að yfirleitt sé alþjóðasviðið þjónustuaðili við lögreglu erlendis en þá þarf hin erlenda lögregla að óska eftir aðstoð. Verði alþjóðleg handtökuskipun gefin út gæti alþjóðasviðið þó komið að málinu.