Rósa Kristín Hafsteinsdóttir og dansfélagi hennar, Aron Logi Hrannarsson, náðu þeim merka árangri að hreppa gull í Evrópumeistaramótinu í samkvæmisdansi sem fór fram í Blackpool á Englandi um páskana.
Kepptu þau í flokki 19 ára og yngri á föstudaginn langa samkvæmt Skessuhorni. Daginn eftir kepptu þau svo í U-21 árs flokknum þar sem þau gerðu sér lítið fyrir og unnu þá keppni líka. Eru þau því tvöfaldir Evrópumeistarar.
Ljósmynd: Skessuhorn.is
„Þetta er klárlega einn okkar besti árangur hingað til. Þetta er eitthvað sem við höfum stefnt að. Þetta var frábær tilfinning að ná að sigri í okkar aldursflokkum og gefur okkur mikið,“ sagði Rósa Kristín í samtali við Skessuhorn eftir mótið. „Við erum þegar farin að undirbúa okkur fyrir næstu keppni sem verður í maí og fer hún einnig fram í Blackpool. Það er opið mót þar sem allir bestu dansararnir í heiminum koma saman og er svona eiginlegt heimsmeistaramót í samkvæmisdönsum. Okkur hlakkar mikið til taka þátt í þeirri keppni.“
Fram kemur á Skessuhorn.is að þau Rósa og Aron æfi alla daga vikunnar í íþróttahúsinu á Digranesi undir leiðsögn hjónanna Karenar og Adams Reeve.