Það eru ekki bara súkkulaðiegg sem gleðja um páskana en löng röð myndaðist meðfram hjálpatækjaversluninni Blush á Dalvegi í Kópavogi fyrir klukkan 11 í morgun. Ástæðan fyrir röðinni var páskaeggjaleit Blush en verslunin fagnar með þessu 11 ára afmæli verslunarinnar. Fyrir einskæra tilviljun var blaðamaður Mannlífs á staðnum. Og fangaði stemmninguna.
Eftirvænting fólks fyrir utan Blush var rafmögnuð þegar klukkan sló 11 í morgun. Fólk á öllum aldri og kynjum ætti þá inn í verslunina og hófst við að leita að páskaeggjum í von um eggjandi vinninga. Fljótlega tók einn og einn að týnast að afgreiðsluborðinu með egg sem það fann falið á bak við gervilimi, rassainnstungur, múffur, handjárn, sleypiefni og fleira skemmtilegt sem hægt er að finna í kynlífstækjaverslun. Ekki voru allir jafn fundvísir en það er enn von því það verður opið til 21:00 í kvöld og það er eggjum bætt við reglulega.
En hvað er í eggjunum? Nammi? Málshættir? Titrarar? Nei, það er miði með númeri á. Vinningarnir sem hægt er að fá á þessi númer eru allskonar, frá sleipiefnum og spilum til sogtækja og gjafabréf fyrir allt að 100.000 kr. Já og ýmislegt þar á milli
Og úr því að blaðamaður Mannlífs var alveg óvart staddur fyrir utan Blush þegar lætin byrjuðu ákvað hann að taka eiganda Blush, Gerði Huld Arinbjarnardóttur, tali.
Ljósmynd: Björgvin Gunnarsson
Blaðamaður: „Ertu ekki ánægð með byrjunina?“
Gerður: „Jú, ekkert smá! Þetta er geggjað! Það var röð meðfram öllu húsinu klukkan 11.“
Blaðamaður: „Frábært, og þetta er bara rétt að byrja ekki satt?“
Gerður: „Jú, við erum með opið til kl. 21:00 en frá klukkan 18:00 bjóðum við upp á Dj og fljótandi veitingar og svo verðum við með sérstakan leynigest.“
Þó að blaðamaður Mannlífs hafi ekki haft heppnina með sér í þetta skiptið voru margir sem fóru heim með bros á vör og vinning sem hjálpar til að gera páskana gleðilega.