Karlmaður var handtekinn vegna hnífstunguárásar í miðbæ Reykjavíkur í gærmorgun, föstudaginn langa, og hefur verið úrskurðaður í þriggja vikna gæsluvarðhald.
Árásin átti sér stað fyrir utan skemmtistaðinn Prikið. RÚV greinir frá málinu.
Ævar Pálmi Pálmason, yfirlögregluþjónn hjá lögreglunni á höfuðborgarsvæðinu, sagði í samtali við RÚV í gær að rannsókn málsins miðaði vel og að lögregla hafi verið fljót að ná utan um það.
Árásarmaðurinn hefur verið úrskurðaður í gæsluvarðhald til 6. maí. Grímur Grímsson, yfirlögregluþjónn hjá lögreglunni á höfuðborgarsvæðinu, staðfestir þetta við fréttastofu RÚV. Er ákvörðunin um gæsluvarðhald yfir manninum sögð vera tekin vegna rannsóknarhagsmuna í málinu. Enn liggur ekki fyrir hvort úrskurðurinn um gæsluvarðhald hafi þegar verið kærður til Landsréttar.
Að sögn voru tveir menn handteknir í tengslum við árásina en hinn maðurinn var þó ekki úrskurðaður í gæsluvarðhald. Honum var sleppt að lokinni skýrslutöku hjá lögreglu.
Sá sem varð fyrir stunguárásinni er sagður hafa hlotið lífshættulega áverka. Hann var strax fluttur á sjúkrahús þar sem hann gekkst undir aðgerð. Ekki er vitað um líðan mannsins.