Foreldrafélög Stapaskóla í Reykjanesbæ hafa sent áskorun á stjórnendur skólans og á bæjarstjóra Reykjanesbæjar, þar sem krafist er að horfið sé frá ráðningu Leifs Garðarssonar í stöðu deildarstjóra unglingasviðs. Kemur þetta fram í frétt Víkurfrétta.
Mannlíf hefur fjallað ítarlega um málið undanfarna daga en ráðningin hefur verið mjög umdeild í Reykjanesbæ. Leifur var látinn hætta fyrir ári síðan, bæði sem skólastjóri Áslandsskóla og sem körfuknattleiksþjálfari í efstu deild, eftir að upp komst um óviðeigandi skilaboð sem hann sendi á 22 ára gamlan leikmann í kvennaflokki. Hann var einnig látinn taka poka sinn sem þjálfari Víkings árið 2011 eftir að hann sendi fyrir slysni excel-skjal á alla leikmenn liðsins, þar sem hann hafði flokkað þá og lýst yfir áliti sínum á hverjum og einum leikmanni. Þá kom einnig fram hjá Mannlíf að samkvæmt áreiðanlegum heimildum hefðu nokkrar konur sem störfuðu í Áslandsskóla sem kennarar, sent kvörtun vegna Leifs en að engin viðbrögð hefðu borist frá skólaskrifstofunni.
Sjá einnig: Leifur áreitti fyrrverandi nemanda sinn: „Hann var aftur og aftur að hafa samband seint á kvöldin“
„Foreldrafélög Stapaskóla hafa sent áskorun á stjórnendur skólans og bæjarstjóra, þess efnis að hverfa frá ráðningu Leifs Garðarssonar í stöðu deildarstjóra unglingasviðs. Í ljósi alvarlegra ásakana um óviðeigandi hegðun hans gagnvart ungum konum er almenn óánægja foreldra og nemenda skólans með ráðningu hans,“ segir í yfirlýsingu foreldrafélaga Stapaskóla á grunnskóla og leikskólastigi.