Kona nokkur varar við grunsamlegum manni sem sást elta svartan kött í Norðurmýrinni í morgun. Sumir telja þetta kattarníðinginn sem sást fyrst í hverfinu í janúar.
Hildur Guðbrandsdóttir skrifar greinagóða lýsingu á grunsamlegum manni sem hún sá elta kött og reyna að fanga, inni á Facebook hóp íbúa Norðurmýrarinnar. Segir hún manninn frekar lágvaxinn, með yfirvaraskegg og dökkt, krullað hár, klæddan í bláan mittisjakka. Þá sé hann með skallatungl. Ennfremur segir hún að maðurinn hafi haldið á stórri málningafötu með loki og að hann hafi ferðast um á svörtu hlaupahjóli sem hann hefði sennilega stolið, hann hafi verið það klaufskur á það.
Ein af þeim mörgu sem svara þessum pósti Hildar telur líklegt að maðurinn sé sá hinn sami og níðst hefði á köttum fyrr á árinu, í hverfinu. Sá hafi, samkvæmt sögusögnum flutt svo úr hverfinu yfir í nágrannahverfi. Hann sé mögulega snúinn aftur og haldi uppi uppteknum hætti við að níðast á köttum.