Yfirleitt fellur það sem Gunnar Smári Egilsson, fjölmiðlamaður og sósíalisti, segir vel í kramið á meðlimum hópsins Sósíalistaflokkur Íslands en það á ekki við færslu hans í gær. Gunnar Smári birti skjáskot úr viðtali við Sigurð Inga Jóhannsson, samgöngu- og sveitastjórnarráðherra, í kvöldfréttum Stöðvar 2 í gær. Á þeirri mynd má sjá að ráðherrann var léttklæddur í hvítum nærbol.
Gunnar Smári skrifar um þetta: „Eina leiðin fyrir ráðherra að toppa þetta er að mæta ber á ofan í viðtal.“ Flestir sem skrifa athugasemd við færsluna eru á því máli að þetta sé hið besta mál, enda alþýðlegt.
Einn skrifar: „Vinalegt, allt of mikið jakkafatadæmi í gangi oft allan daginn.“ Kona nokkur skrifar svo: „Látiði ekki svona , nýkominn úr sturtu eftir puðið í hesthúsinu, það er a.m.k. margt sem ég vildi breyta hjá honum áður en ég kæmi að fatavalinu, s.s. afstaðan til sjávarutvagsins, stjórnarskrárinnar o.m. fl.“ Önnur tekur undir og segir: „Bara heimilislegur, Ekkert má maður. Ekki einu sinni heima hjá sér.“
Stuðmaðurinn Jakob Frímann Magnússon er á sama máli og fyrrnefnt fólk og segir: „Sigurður Ingi er flottur. Skemmtilega alþýðlegur, afslappaður og ærlegur.“ Gunnar Smári virðist þó ekki taka þessu illa. „Ekkert má maður lengur. Ekki einu sinni að benda á að ráðherra mæti í sjónvarpsviðtal á nærbolnum í fyrsta skipti.“